MEDSI klinikasida yurak-o‘pka reanimatsiyasi bo‘yicha trening

2026-yil 23-sentabr kuni Toshkentdagi MEDSI klinikasida tibbiyot xodimlari uchun «Yurak-o‘pka reanimatsiyasi» mavzusida trening o‘tkazildi.

Mashg‘ulotni anesteziologiya va reanimatsiya bo‘limi mudiri, 30 yillik ish tajribasiga ega oliy toifali anesteziolog-reanimatolog Jaxanbayev Sodikjon Sativaldiyevich olib bordi.

Ishtirokchilar qon aylanishi va nafas olish to‘xtashining belgilari, reanimatsiya tadbirlarining ketma-ketligi, ko‘krak qafasini bosish texnikasi hamda nafas yo‘llari o‘tkazuvchanligini ta’minlash usullarini ko‘rib chiqdilar. Ambu qopchasi yordamida o‘pkani sun’iy ventilyatsiya qilish, defibrillyatordan foydalanish va reanimatsiya vaqtida dori vositalarini qo‘llash masalalariga alohida e’tibor qaratildi. Nazariy qism reanimatsiya uskunalari bilan ishlash bo‘yicha amaliy namoyish bilan to‘ldirildi.